ஆர் வத்ஸலா
மறுபடியும்
அவன் மௌனம் நீளுகிறது
காத்திருந்து
கோபித்துக் கொண்டு
அவனை சபித்து
பின்
நாக்கை கடித்து கன்னத்தில் போட்டுக் கொண்டு
அவன் தரப்பு சாக்குகளை-
அவன் அம்மாவுக்கு உடம்பு சுகமில்லை
அவன் நண்பனுக்கு பெரிய பிரச்சினை
அவனுக்கு மனச் சோர்வு-
இப்படி ஏதாவது
கற்பித்துக் கொண்டு
பின்
சலித்து
அழுது
சூளுரைக்கிறேன்
‘இன்றோடு
அவன் உறவை துண்டித்துக் கொள்கிறேன்
நிரந்தரமாக’
என்று
தயவு செய்து கேட்காதீர்கள்
யாரும்
எத்தனையாவது முறையாக
என்று
