—-வளவ. துரையன்

அந்தக் கோயிலின் 

உள் பிரகார மூலையில்தான் 

அவனும் அவளும் சந்திக்கிறார்கள் 

ஓர் ஆறு மாதகாலமாக

புறாக்களைப் போல 

எப்போதும் குசு குசுவென்று 

ரகசியப் பேச்சுகள்தாம் 

சிறு சிறு முறுவல்கள் 

லேசான தொடுகைகள்

இப்பொழுது

ஒரு வார காலமாய் 

அவளிருந்தாள் 

அவனில்லை 

அடுத்த வாரம் 

அவன் இருக்க 

அவளைக் காணோம்

எல்லாவற்றையும் கண்விழித்து 

எப்போதும் பார்த்த 

அகல் விளக்குகள் அழுதன

கோயில் யானையோ 

தலையாட்டிக்கொண்டு 

சிரித்தது.

Series Navigation

ட்ரம்பின் புத்தாண்டு பரிசு 2026…மழைபுராணம் -16