இளமை வெயில்

This entry is part 7 of 17 in the series 5 ஜூன் 2022

 

 

என்னைச் சுமந்தபடி

அம்மா சூட்டில் நடந்தது

 

அம்மாவும் நானும்

காய்ந்த நெல்லைக்

கோணியில் சேர்த்தது

 

மதியம் அத்தா சாப்பிட

நான் விசிறிவிசிறி நின்றது

 

அம்மை ஊசிக்கு

ஓடி ஒளிந்தது

 

பனந்தோப்பில்

காணல்நீர் கண்டது

அங்கு நுங்கு குடித்தது

 

கரிக்கண்ணாடியில்

கிரகணம் பார்த்தது

 

காயும் கறிக்கு

காவல் இருந்தது

 

கொலுசுவீட்டுச் சுவரேறி

கொய்யா பறித்தது

 

நவ்வாப்பழக்காரி

பொன்வண்டு தந்தது

அது முட்டையிட்டது

 

பசு பார்வதியை

பொங்கலன்று கழுவியது

 

குழந்தைகள் தினத்தில்

காலைக்காட்சி காசின்றி

கண்டு திரும்பியது

 

தூண்டிலில்

விரால் விழுந்தது

 

கூண்டுக்கிளி பறந்துபோனது

என் பாட்டி பிரிந்துபோனது

 

கூடிக்கூடி

கூட்டாஞ்சோ றாக்கியது

 

தேன்கூடு கலைத்தது

தேனீ கொட்டியது

 

தூரத்தில்

விமானம் பார்த்தது

 

பம்பரம் கோலி

கிட்டிப்புல்லென்று திரிந்தது

 

முதல் செருப்பு வாங்கியது

முதல் சைக்கிள் ஓட்டியது

 

ஒரு நட்பு முளைத்தது

அது சண்டையில் முறிந்தது

 

காலணா தொலைத்தது

எட்டணா கண்டது

 

பள்ளிக்கூடம் சென்றது

குச்சி ஐஸ் சூப்பியது

 

இன்னும் எத்தனையோ

எல்லாமுமே என்

இளமைக்கால

வெயில் நினைவுகள்

 

அமீதாம்மாள்

 

 

 

Series Navigationதொட்டனைத்து ஊறும்…மோ
author

அமீதாம்மாள்

Similar Posts

Leave a Reply

Your email address will not be published. Required fields are marked *