(முன்னேறத் துடிக்கும் இளந்தலைமுறையினருக்கு வெற்றிக்கு வழிகாட்டும் வாழ்வியல் தன்னம்பிக்கைத் தொடர் கட்டுரை)
முனைவர் சி.சேதுராமன், தமிழாய்வுத்துறைத்தலைவர், மாட்சிமை தங்கியமன்னர் கல்லூரி, புதுக்கோட்டை.
35.ஹிட்லரின் சித்தாந்தத்தைச் சிதறடித்த ஏழை……
என்னங்க வேகவேகமா மூச்சிறைக்க ஓடி வர்ரீங்க…என்னது….ஓடிப் பழகுறீங்களா…? ஆமா எதுக்கு இந்த வயசுல ஓடிப் பழகுறேங்குறீங்க….. ஓ…ஹோ….ஓ…ஓடுறதுக்கு வயசில்லேங்குறீங்களா….? அப்ப ஓடுங்க ஓடுங்க…அதுக்கு முன்னாலே ஒங்ககிட்ட நான் போனவாரம் கேட்டேன்ல அந்தக் கேள்விக்குப் பதிலச் சொல்லுங்க…..
என்னங்க ஓடிக்கிட்டே இருக்குறீங்க…நின்னு பதிலச் சொல்லுங்க…என்ன அவரு ஓட்டப்பந்தய வீரரா…சரி….பேரச் சொல்லுங்க…”ஏழ்மை என்றும் அடிமை என்றும் எவனுமில்லை நாட்டிலே”…என்னங்க பேரச் சொல்லுங்கன்னு சொன்னா பாரதியாரின் பாடல் வரியைச் சொல்றீங்க… ஓஹோ…ஹோ….ஓ..ரொம்ப ரொம்பச் சரிங்க…. ஜெசிஓவன்ஸ்…தான் அவரோட பேரு. அவரு கொத்தடிமையா வாழ்ந்த ஒருத்தரோட பேரன்..அதுக்காகத்தான் பாரதியார் பாடின பாடல் வரியைச் சொன்னீங்களா…
சரி அப்ப அவரப்பத்தி ஒங்களுக்கு நெறையத் தெரியும்னு நெனக்கிறேன்… … என்னது பேருதான் தெரியும் மற்றது ஒண்ணும் தெரியாதுங்குறீங்களா…சரி அவரப் பத்தி சொல்றேன்…கேளுங்க…
உலகத்துல நிறம், மதம், அரசியல் ஆகியவைதான் மக்களப் பிரிக்குது… இந்தப் பிரிவினைகள் மட்டும் இல்லேன்னா…மனித குலம் அமைதியாவும் நிம்மதியாவும் வாழும்…. அதுலயும் ஐரோப்பா அமெரிக்கா நாடுகள்ல நிறவெறி தலைவிரிச்சு ஆடுச்சு..அந்தச் சமயத்துலதான் ஜெசிஓவன்ஸ் பிறந்தாரு..
பிறப்பு என்பது ஆண்டவன் கொடுத்தது..பிறப்பால ஒருத்தரு உயர்ந்தவரோ தாழ்ந்தவரோ ஆகிட மாட்டாருங்க..அவரோட செயலாலயும், ஒழுக்கத்தாலயும் தான் அவங்கள மக்கள் உயர்ந்தவங்களாகவோ தாழ்ந்தவங்களாகவோ மக்கள் நெனக்கிறாங்க…. … அதனாலதான் வள்ளுவருகூட, “பிறப்பொக்கும் எல்லா உயிர்க்கும்” என்று கூறினார்.. வறுமை, நிறவெறி, இன ஒதுக்கல், என பல சமூக அநீதிகளை எல்லாம் தாண்டித்தான் ஓவன்ஸால் சாதிக்க முடிஞ்சது..
உழைப்பும் ஓட்டமும்
1913 -ஆம் ஆண்டு செப்டம்பர் 12-ஆம் நாள் அமெரிக்காவில் உள்ள அலபாமா மாநிலத்தில் ஓர் எளிமையான கருப்பர் இனக் குடும்பத்தில் ஏழாவது பிள்ளையாக ஜேம்ஸ் கிளீவ்லண்ட் ஓவன்ஸ் பிறந்தார். அவரது தாத்தா கொத்தடிமையாக இருந்தவர். ஜேம்ஸ் க்ளீவ்லேண்ட் ஓவன்ஸ்(James Cleveland Owens) என்பதன் முதல் எழுத்துக்களைக் கொண்டு ஓவன்ஸை எல்லோரும் J C என்று அழைப்பார்கள். ஜெசி ஓவன்ஸ் பள்ளிக்குச் சென்ற முதல் நாளில் அவரது பெயரை ஆசிரியர் கேட்க ஜெ சி என்று ஓவன்ஸ் சொல்ல, அதனையே ஜெசி என்று ஆசிரியர் எழுதிக்கொண்டார். அன்றிலிருந்து அவரது பெயர் ஜெசி ஓவன்ஸ் என்றானது.
ஜெசி ஓவன்ஸ் குடும்பம் ஏழ்மையாக இருந்ததால் அவரது இளமை வாழ்க்கை துன்பமயமானதாக இருந்தது. வறுமையை விரட்ட அவர் இளம் வயதிலேயே உழைக்க வேண்டியிருந்தது. ஓவன்ஸ் தனது குடும்பத்திற்கு உதவ, கடையிலிருந்து மளிகைப் பொருட்களை வீடுகளுக்குக் கொண்டுபோய்க் கொடுப்பது, காலணிகள் பழுது பார்ப்பது, மின்தூக்கிகள்(லிப்ட்) இயக்குவது உள்ளிட்ட பல்வேறு வேலைகளைச் செய்தார்.
ஓய்வென்றால் என்னவென்றே அறியாது அந்த இளம் வயதில் வறுமையிடம் இருந்து தப்பிக்க கடுமையாக உழைத்தார். ஓவன்ஸ் அந்த வேலைகளைச் செய்யும்போதுதான் ஓடுவதுதான் தனக்குரிய விளையாட்டு என்றும் அதுதான் தனது வாழ்க்கைக்கு உயர்வளிக்கும் என்பதையும் ஓவன்ஸ் உணர்ந்தார். ஓவன்ஸின் அந்தத் தெளிவுதான் அவரது வாழ்க்கையையே மாற்றி அமைத்தது. ஆம்! வறுமை அவருக்கு அவருடைய இலக்கைச் சுட்டிக் காட்டியது. அன்றிலிருந்து ஓவன்ஸ் தனக்குரிய இலக்கை நோக்கிப் பயணிக்கத் தொடங்கினார்.
திருப்புமுனையை ஏற்படுத்திய ஓட்டம்
ஜெசிஓவன்ஸ் பள்ளியில் பயிலும்போது ஒருநாள் பள்ளியில் அறுபது மீட்டர் தூரம் ஓடும் போட்டி நடைபெற்றது. அதில் கலந்து கொண்டு மிகச் சிறப்பாக ஜேசி ஓவன்ஸ் ஓடினார். அந்த ஓட்டம்தான் அவரது வாழ்க்கையில் திருப்பம் ஏற்படக் காரணமாக அமைந்தது. நன்றாக ஓடிய ஜெசிஓவன்ஸ்ஸைப் பார்த்து அவருக்கு நல்ல எதிர்காலம் இருக்கிறது என்பதை பயிற்றுவிப்பாளர் சார்லிரைலி உணர்ந்தார். அதனால் அவர் ஜெசிக்கு ஓட்டத்தில் நன்றாகப் பயிற்சி அளிக்க விரும்பினார். ஆனால் பள்ளி முடிந்து பல வேலைகள் பார்க்கும் கட்டாயம் இருந்ததால் தன்னால் எவ்வாறு பயிற்சியில் ஈடுபட இயலும் என்று ஜேசிஓவன்ஸ் தயங்கினார். அவரது நிலையை புரிந்துகொண்ட ரைலி காலை நேரங்களில் தனியாகப் பயிற்சியளிப்பதாகக் கூறவே ஜேசிஓவன்ஸ் அதனை ஏற்றுக்கொண்டார். அதிலிருந்து அவர் பட்டைத் தீட்டிய வைரமாக ஒளிரத் தொடங்கினார்.
ஜெசி ஓவன்சுக்கு 19 வயதானபோது கல்லூரித் திடல்திடப் போட்டிகளில் கலந்து கொண்டு ஓடினார். அவர் நூறு மீட்டர் ஓட்டப் பந்தயத்தில் கலந்து கொண்டு மிகவிரைவாக ஓடி அவ்வோட்டத்தில் அப்போதிருந்த உலகச் சாதனையை சமன் செய்தார். அவரது வியக்கத்தக்க ஓட்டத்திறனைக் கண்ட அமெரிக்கப் பல்கலைக்கழகங்கள் அவரைத் தங்கள் பல்கலைக்கழகத்தில் பயிலக்கூடிய மாணவராக்கிக் கொள்ளக் கடுமையாகப் போட்டி போட்டனர். தனக்கு அழைப்பு விடுத்த 28 பல்கலைக்கழகங்களிலிருந்து ஒஹாயோ ஸ்டேட் (Ohio State University) பல்கலைக்கழகத்தை மட்டும் ஜெஸிஓவான்ஸ் தேர்ந்தெடுத்து அப்பல்கலைக்கழகத்தில் பயில்வதற்குச் சேர்ந்தார்.
பாத்துக்குங்க…திறமை யாரிடம் இருந்தாலும் அவங்களத் தேடி யாரா இருந்தாலும் ஓடி வந்து வரவேற்பாங்க… திறமையாளனை இந்த உலகம் வரவேற்கத் தயாரா இருக்கும். அதைப் புரிஞ்சுக்கணும். எதுலயும் திறமையோட நம்பிக்கையும் விடா முயற்சியும் கடும் உழைப்பும் இருந்தா நிச்சயம் வெற்றியாளரா நாம திகழ்வோம்…நம்மைத் தேடி இங்க வா இங்க வான்னு வாய்ப்புகள் வந்துகிட்டே இருக்கும்.. அந்த வாய்ப்ப நாம சரியாப் பயன்படுத்திக்கணும். அந்தமாதிரிதான் ஜெஸிஓவான்ஸ் தன்னைத் தேடிவந்த வாய்ப்பினைப் பயன்படுத்திக் கொண்டார்.
இன ஒதுக்கலால் பட்ட துயரம்
அவரோட திறமையால அவருக்குப் படிக்க வாய்ப்புக் கிடைச்சாலும் அவர அப்போது அமெரிக்காவில் நிலவிய இனவெறி ஒதுக்கல் நிம்மதியா இருக்க விடல… மனித இனம் எல்லாம் ஒண்ணுதான்….அதுல வேறுபாடு பாக்கக்கூடாது…அதுலயும் நிறவெறி இருக்கே அது ரெம்பக் கொடுமையானது… தன்னோட இனத்தைப் பற்றோட நேசிக்கலாம்…ஆனா…அடுத்த இனத்தை வெறியோட பாக்குறது, பழிவாங்க நெனக்கிறது தப்புல்ல…அது பாவமான செயலாகும்.
ஆனா இதெல்லாம் நெனச்சா பாக்குறாங்க… ஜெஸிஓவான்ஸ் படிக்கப் போன பல்கலைக்கழகத்துல இந்த இனவெறி ஒதுக்கல் ரொம்ப இருந்தது… இழிந்த இன ஒதுக்கலால ஜெஸிஓவான்ஸ் பல்வேறு இன்னல்களைச் சந்தித்தார். அவர் கருப்பினத்தைச் சார்ந்தவர் என்பதால் பல்கலைக்கழக வளாகத்தில் தங்குவதற்கு அவருக்கு அனுமதி மறுக்கப்பட்டது. பல்கலைக்கழக விளையாட்டுக் குழுக்களோடு பயணம் செய்யும்போது வெள்ளை இனத்து மாணவர்களுடன் அமர்ந்து பயணம் செய்யக் கூடாது என்றும் அவர்கள் இருக்கைகளில் அமர்ந்திருந்தால் ஜெஸிஓவான்ஸ் வெள்ளை இன மாணவரின் காலடியில் அமர வேண்டும் என்றெல்லாம் நிர்பந்திக்கப்பட்டார். மேலும் கருப்பர்களுக்கென்று ஒதுக்கப்பட்ட இடங்களில்தான் அமர வேண்டும் என்று கட்டாயப்படுத்தப்பட்டார்.
மேலும் உண்ணும் உணவிற்காக அல்லாட வேண்டியிருந்தது. கருப்பர் இனமக்கள் உண்ணும் உணவகங்களிலும், ஹோட்டல்களில் மட்டும்தான் அவர் உணவு உண்ண முடியும், தங்க முடியும். வெள்ளையர்கள் இருக்கும் உணவகங்களிலோ ஹோட்டல்களிலோ அவர் உண்ண முடியாது. அவ்வாறு உணவு உண்ண வேண்டுமெனில் உண்வைப் பொட்டலமாக வாங்கிக் கொண்டு வந்து வெளியில் வைத்தே உண்ண வேண்டும். அவரது திறமையின் காரணமாக தவிர்க்க முடியாத சில சமயங்களில் அவர் வெள்ளையர்களின் ஹோட்டல்களில் தங்க அனுமதிக்கப்பட்டாலும் அவர் ஹோட்டலின் பின் கதவு வழியாகத்தான் ஹோட்டலுக்குள் நுழைய வேண்டும். அப்போதுதான் அவருக்கு ஹோட்டலுக்குள் நுழைவதற்கு அனுமதிகிட்டும். இல்லையெனில் அவர் வெளியில்தான் நிற்க நேரிடும். எதிர்த்து எதுவும் அவரால யாரிடமும் கேட்க முடியல…
மிகுந்த மனவேதனையுடன் இவற்றையெல்லாம் ஜெஸிஓவான்ஸ் பொறுத்துக் கொண்டார். இதைவிடக் கொடுமை என்ன தெரியுமா பல மாடிக் கட்டிடமாக விளங்கும் ஹோட்டலுக்குள் எந்தச் சூழலிலும் (லிப்ட்டை) மின் தூக்கியைப் பயன்படுத்தக்கூடாது. அப்படிப் பயன்படுத்தினால் சட்டப்படி அவருக்குத் தண்டனை கிடைக்கும். எந்த நிலையில் அவர் இருந்தாலும் அவர் படிகளில் நடந்தே ஏறி மேலே செல்ல வேண்டும். இப்படி சொல்ல முடியாத துன்பங்களுக்கு ஜெஸிஓவான்ஸ் ஆளானார். இருந்தாலும், ஜெஸிஓவான்ஸ், “சுடச்சுடரும் ஒளிவிடும் பொன்போல்” விளங்கினாரே தவிர தளர்ந்து போகவில்லை.
இனிய இல்லற வாழ்க்கை
நிற ஒதுக்கல்களால ஜெசிஓவன்ஸ் ரொம்பப் பாதிக்கப்பட்டாலும் அவருக்கு இனிய இல்லற வாழ்க்கை அமைஞ்சது. அவர் ரூத்சாலமன் என்ற பெண்ணை உயிருக்கு உயிராக் காதலித்தார். ஜெசிஓவன்ஸ் தான் காதலித்த ரூத் சாலமனையே மணந்து கொண்டார்.
“காதல் என்பது காலத்தை வெல்வது
காதல் என்பது கடவுளின்
படைப்பின் ஊற்றுப் பணி
காதல் என்பது கட்டுப்பாடுள்ளது
காதல் என்பது கவலையையும்
மகிழ்ச்சியாய் மாற்றித் திகழ்வது
காதல் என்பது உயிர்களின்
இயக்கத்தின் அடிப்படையானது
காதல் என்பது பொய்யை
அறவே விரட்டி நிற்பது
காதல் என்பது இருவர் இணைந்து
தாங்கித் தூக்கி உயர்வதற்கு உதவுவது
காதல் என்பது என்றைக்கும்
இளமையாய் இதயத்தில் வதிவது
காதல் என்பது வாழ்வில் தித்திக்கும்
இனிப்பாய் என்றும் இறுதிவரைத் தொடர்வது
காதல் என்பது இன்பமும் துன்பமும்
ஒன்றேயென்று உணர்த்துவது; உணரச் செய்வது”
என்பதற்கேற்ப ஜெசிஓவன்ஸினுடைய காதலி ரூத்சாலமன் அவரின் வெற்றிகளுக்குப் பின்புலமாகவும் காரணமாகவும் இருந்தாங்க. காதலிப்பதும் காதலித்த பெண்ணையே மனைவியா அடைவதும் வாழ்க்கையில இறைவன் கொடுத்த வரம் என்பதை ஜெசிஓவன்ஸ் நல்லா உணர்ந்திருந்தாரு. அவரு தன்னோட மனைவியை ரொம்ப நேசிச்சாரு. அவங்களோட இல்லறம் நல்லறமாக விளங்கியது. அந்த நல்லறத்தின் பலனாக குளோரியா (Gloria), பேவெர்லி (Beverly), மார்லின் (Marlene) என்ற மூன்று பெண் குழந்தைகள் அவர்களுக்குப் பிறந்தன. அவர்களும் அவரது பெயரைச் சொல்லும் வண்ணம் சிறப்பாகப் பின்னாளில் வாழ்ந்து வருவது குறிப்பிடத்தக்கது.
ஜெசி ஓவன்ஸ் நிகழ்த்திய அதியசயம்
வெள்ளை இனத்தவரால் எல்லா நிலைகளிலும் ஒதுக்கப்பட்ட ஓவன்ஸ் அவரது ஓட்டத்திறமைக்காக மட்டுமே அவர்களால் விரும்பபட்டார். தனக்கு இழைக்கப்படும் சமூக அநீகளுக்கு ஜெசி ஓவன்ஸ் தன் கால்களாலேயே பதிலடி தந்தார் ஓவன்ஸ். ஆம்!
“மிகுதியான் மிக்கவை செய்தாரைத் தாம் தம்
தகுதியான் வென்று விடல்”
என்ற குறளுக்கு ஏற்ப 1935 – ஆம் ஆண்டு மே மாதம் 25 – ஆம் நாள் ஜெசி ஓவன்ஸ் ஓர் அதிசயத்தை நிகழ்த்திக் காட்டினார். அந்த ஒரே நாளில் ஜெசி ஓவன்ஸ் 100மீ, 200மீ உள்ளிட்ட ஓட்டப் பந்தயங்களில் கலந்துகொண்டு மூன்று உலகச் சாதனைகளை நிகழ்த்தி நான்காவது சாதனையையும் சமன் செய்தார். அதற்கு அவர் எடுத்துக்கொண்ட நேரம் 45 நிமிடங்கள் மட்டுமே ஆகும். விளையாட்டு உலகில் அதற்கு முன்னும் பின்னும் இதுபோன்ற ஒரு சாதனை யாராலும் நிகழ்த்தப்பட்டதில்லை, அதற்குப் பிறகும் ஜெசி ஓவன்ஸின் சாதனை முறியடிக்கப்படவில்லை என்பது குறிப்பிடத்தக்கது.
ஹிட்லரை வெறுப்பில் ஆழ்த்திய ஜெசி ஓவன்ஸ்
ஜெசி ஓவன்ஸ் 1936-ஆம் ஆண்டு உலகை வியப்பிலும், ஹிட்லரை வெறுப்பிலும் ஆழ்த்தினார். அந்த ஆண்டு பெர்லினில் நடைபெற்ற ஒலிம்பிக் போட்டியில் அவர் ஒளிர்ந்தார். சர்வாதிகாரியான ஹிட்லர் ஜெர்மனியின் ஆட்சியாளராக அப்போது இருந்தார். அதனால் அவ்வொலிம்பிக் போட்டியைப் பலரும் ஹிட்லர் ஒலிம்பிக் போட்டிகள் என்று வருணித்தனர். உலகிலேயே வெள்ளை நிறத்தவரான ஆரியர்கள்தான் உயர்ந்தவர்கள்; அவர்களால்தான் எல்லாவற்றிலும் சாதனைகளைப் படைக்க இயலும் என்ற இருமாப்போடு அமர்ந்திருந்தார் ஹிட்லர். இத்தகைய தவறான சித்தாந்தத்தை ஹிட்லரின் கண்களுக்கு முன்பே ஜெசி ஓவன்ஸ் சிதைத்தார். தோலின் நிறத்தால் மட்டுமே ஓர் இனம் இன்னொரு இனத்தை விட சிறந்ததாகி விட முடியாது என்பதை ஜெசிஓவன்ஸ் உலகுக்கு நிரூபித்துக் காட்டினார்
ஜெசிஓவன்ஸ் மூன்று உலகச் சாதனைகளோடு நான்கு தங்கப்பதக்கங்களை வென்று குவித்தார். 100 மீட்டர், 200 மீட்டர், 4×100 மீட்டர், நீளம் தாண்டுதல் ஆகிய போட்டிகளில் ஓவன்ஸ்க்கு தங்கப் பதக்கங்கள் கிடைத்தன. ஒரே ஒலிம்பிக் போட்டியில் நான்கு தங்கப்பதக்கங்களை வென்ற முதல் அமெரிக்கர் என்ற பெருமையும் அவருக்குக் கிட்டியது குறிப்பிடத்தக்கது.
இதனைச் சற்றும் எதிர்பாராத ஹிட்லர், உலகின் கண்களுக்கு முன்னர் தனது சித்தாந்தம் சிதைந்து போன வெறுப்பில் ஒலிம்பிக்ப் போட்டிகள் நடைபெற்ற விளையாட்டு அரங்கத்தை விட்டு ஆத்திரத்தோடும் வெறுப்போடும் வெளியேறினார். ஆனால் ஜெர்மன் விளையாட்டு ரசிகர்களோ ஓவன்ஸை கைதட்டி உற்சாகப்படுத்தி, ஊக்கமூட்டினர்.
ஜெசிஓவன்ஸ் மூன்று உலகச் சாதனைகளோடு நான்கு தங்கப் பதக்கங்களை வென்று குவித்தார். 100 மீட்டர், 200 மீட்டர், 4×100 மீட்டர், நீளம் தாண்டுதல் ஆகிய போட்டிகளில் ஓவன்ஸ்க்கு தங்கப் பதக்கங்கள் கிடைத்தன. ஒரே ஒலிம்பிக் போட்டியில் நான்கு தங்கப்பதக்கங்களை வென்ற முதல் அமெரிக்கர் என்ற பெருமையும் அவருக்குக் கிட்டியது குறிப்பிடத்தக்கது.
இதனைச் சற்றும் எதிர்பாராத ஹிட்லர், உலகின் கண்களுக்கு முன்னர் தனது சித்தாந்தம் சிதைந்து போன வெறுப்பில் ஒலிம்பிக்ப் போட்டிகள் நடைபெற்ற விளையாட்டு அரங்கத்தை விட்டு ஆத்திரத்தோடும் வெறுப்போடும் வெளியேறினார். ஆனால் ஜெர்மன் விளையாட்டு ரசிகர்களோ ஓவன்ஸை கைதட்டி உற்சாகப்படுத்தி, ஊக்கமூட்டினர்.
ஓவன்ஸின் உழைப்பும் கிடைத்த விருதும்
உலக சாதனையைச் செய்தும் ஜெஸிஓவன்ஸ் கருப்பர் என்ற ஒரே காரணத்துக்காக அவரை எந்த விளம்பர நிறுவனமும் ஒப்பந்தம் செய்ய முன் வரவில்லை. இதற்காக ஜெஸிஓவன்ஸ் கவலைப்படவில்லை. பலருக்கும் ஊக்கத்தினை அளித்து முன்னேறத் துடிக்கும் இளைஞர்களை வாழ்வில் உயரச் செய்ய வேண்டும் என்று கருதிய ஜெஸிஓவன்ஸ் பல்வேறு பொது நிகழ்ச்சிகளில் கலந்து கொண்டு உரையாற்றினார். அவரது உரையையும் அவரையும் பலரும் விரும்பினர்.
மக்கள் அனைவரையும் ஒன்றிணைக்க வேண்டும் என்பதற்காக சொந்தமாகப் பொது உறவு நிறுவனம் ஒன்றை ஜெஸிஓவன்ஸ் தொடங்கினார். அமெரிக்கா முழுவதும் பயணம் செய்து மதம், நேர்மை, கடும் உழைப்பு ஆகியவற்றைப் பற்றி ஜெஸிஓவன்ஸ் பேசினார். வசதி குறைந்த பகுதிகளில் வசிக்கும் இளைஞர்களுக்காகப் பல விளையாட்டு நிகழ்ச்சிகளில் கலந்து கொண்டு அவர்களுக்கு ஆதரவளித்தார். இளைஞர்களின் உந்து சக்தியாக ஜெஸிஓவன்ஸ் விளங்கினார். தான் மட்டும் முன்னேறினாப் பத்தாதுன்னு அனைவரும் முன்னேறணும்ணு ஜெஸிஓவன்ஸ் நெனச்சாரு. இது பாராட்டுக்குரிய ஒன்றுங்க… ஒவ்வொருத்தருக்கும் இந்த எண்ணம் இருந்தா நிச்சயமா உலகம் சொர்க்கமா மாறிடும்….மாறுமான்னு பார்ப்போம்..சரி…சரி ஜெஸிஓவன்ஸப் பத்தி சொல்றேன் கேளுங்க…
1976 -ஆம் ஆண்டு அப்போது அமெரிக்க அதிபராக இருந்த ஜெரால்ட் ஃபோர்ட் ‘Presidential Medal of Freedom’ எனப்படும் தனி நபருக்கான அமெரிக்காவின் மிக உயர்ந்த விருதை ஜெசிஓவன்ஸ்க்கு வழங்கிச் சிறப்பித்தார்.
ஓட்டத்தை நிறுத்திக் கொண்ட உத்தமர்
இவ்வாறு ஹிட்லரின் எண்ணத்தையே தவிடு பொடியாக்கிய ஜெஸிஓவன்ஸ் பின்னாளில் புற்றுநோயால் பெரிதும் அவதியுற்றார். அதற்கு மருத்துவம் பார்த்தாலும் அந்நோய் குணமாகவில்லை. அந்நோய் அந்தச் சாதனையாளரை வாட்டிவதைத்தது. வாழ்வில் ஓடிஓடி சாதனைகள் படைத்து வெற்றிவீரராகத் திகழ்ந்த ஜெஸிஓவன்ஸால் மரணத்திடமிருந்து தப்பிக்க முடியவில்லை.
“இறைவன் படைத்த இந்த
அழகான உலகைச்
சுற்றிப் பார்க்க வந்த
சுற்றுலாப் பயணிகள் நாம்
ஒருநாள் திரும்பிச் செல்லத்தான்
போகிறோம்…………….! ஆனால்……….!
தேதிகள் மட்டுமே ரகசியம்……….!”
என்பதற்கேற்ப ஜெஸிஓவன்ஸ் புற்றுநோயால் பாதிக்கப்பட்டு 1980 – ஆம் ஆண்டு மார்ச் மாதம் 31-ஆம் நாள் தமது 66 -ஆவது வயதில் காலமானார். உலக ஓட்டத்தை அவரது ஆன்மா நிறுத்திக் கொண்டது. விளையாட்டு உலகம் சரித்திரம் படைத்த ஒரு சாதனையாளரை இழந்தது. அவர் மீது பற்றுக் கொண்டோரை அவரது இழப்பு துயரக் கடலில் ஆழ்த்தியது.
அவரது மறைவுக்குப் பின்னர் ஜெஸிஓவன்ஸின் நினைவாக அவரது மனைவியும் மகள் மார்லினும் “ஜெசி ஓவன்ஸ் பவுண்டேஷன்ஸ்” என்ற அறக்கட்டளையை நிறுவி, அதன் வாயிலாக தங்கள் இலக்கை அடைய விரும்பும் தகுதி படைத்த, ஏழ்மை நிலையில் உள்ள இளைஞர்களுக்கு நிதியுதவி வழங்கி வருகின்றனர். இன்றும் ஜெஸிஓவன்ஸ் அறக்கட்டளையானது தனது இந்த அறப்பணியைத் தொடர்ந்து செய்து வருவது குறிப்பிடத்தக்கது. ஜெஸிஓவன்ஸ் மறைந்தாலும் அவரது சாதனையால் வரலாற்று ஏடுகளில் என்றென்றும் வாழ்ந்து கொண்டே இருப்பார். அவ்வரலாறு சாதனைகள் படைப்போருக்குத் தூண்டுகோலாக அமைந்திருக்கும்…..
கொத்தடிமையாக வாழ்ந்த ஒருவரின் பெயரன் விளையாட்டு உலகில் சாதனைச் சிகரத்தைத் தொட்டது அதிர்ஷ்டத்தாலோ, மாய மந்திரத்தாலோ, ஊக்க மருந்துகளாலோ அல்ல. விளையாட்டுத் திடலில் அவர் சிந்திய வியர்வையும், நம்பிக்கையும், கடும் உழைப்பும், விடாமுயற்யும் தைரியமும்தான் அவரது சாதனைகளுக்கு அடிப்படைக் காரணங்களாக அமைந்தன.
என்னங்க ஜெசிஓவன்ஸோட வரலாற்றைத் தெரிஞ்சுக்கிட்டீங்க…அப்புறம் என்ன எதைப் பற்றியும் கவலைப்படாதீங்க..ஒங்களோட இலக்கை நோக்கிப் பயணமாகுங்க… ஒங்கள ஏளனமாப் பாத்தவங்க எல்லாரும் ஒங்களுடைய வெற்றியைக் கண்டு ஒங்களத் தேடி ஓடிவந்து மரியாதை தருவாங்க… வரலாறு ஒங்க பேரை நிச்சயம் பதிவு செஞ்சுக்கும்… என்ன நீங்க வரலாற்றுல இடம்பெறுவதற்குத் தயார்தானே…
ஒருத்தரு ஏழ்மையான குடும்பத்துல பிறந்து, கடுமையாக உழைத்துப் படித்து, ஆசிரியராகத் தன்னுடைய வாழ்க்கையைத் தொடங்கி, பாரத நாட்டின் மிக உயரிய பதவியான குடியரசுத்தலைவர் பதவியை வகித்தார்….. அவரு யாரு தெரியுமா….?அவர் ஒரு தத்துவ மேதை….உலகமே அவரைப் போற்றிப் புகழ்ந்தது….அவர் தமிழகத்தைச் சேர்ந்தவர்..என்ன கண்டுபிடிச்சுட்டீங்களா….?யோ
- 100- ஆவது கவனக மற்றும் நினைவாற்றல் கலை நிகழ்ச்சி
- படிமை திரைப்பட பயிற்சி இயக்கம் – மாணவர் சேர்க்கை.
- இலங்கை
- சூரியனைச் சுற்றி உரசி வந்த வால்மீன் ஐசான் [Sun-Grazing Comet Ison ] அக்கினிப் பிழம்பில் சிக்கிச் சிதைந்து ஆவியானது
- ஒரு விஞ்ஞான இஸ்லாமியர், மூன்று மெஞ்ஞான இந்துக்கள், ஒரு மெஞ்ஞான் கிறிஸ்துவர் & மேற்கு தொடர்ச்சி மலை.
- எளிமையும் எதார்த்தமும் கலந்த வளவ துரையனின் “சின்னசாமியின் கதை”
- டௌரி தராத கௌரி கல்யாணம்….! -27
- மஹாகவிதை இலக்கிய இதழ் நடத்தும் பாரதி விழா
- கிழிபடும் நீதிபதிகளின் புனிதப் போர்வைகள் காதல் – நீதிமன்றங்களின் கவுரவக் கொலைகள் : திருப்பூர் குணாவின் நூல்
- ஜாக்கி சான் 18. ஒபரா அனுபவம்
- தாகூரின் கீதப் பாமாலை – 91 என் ஆத்ம சமர்ப்பணம்.. !
- புகழ் பெற்ற ஏழைகள் – 35
- நூறு இந்தியத் திரைப்படங்கள் திரையிடல் – பகுதி 3
- திண்ணையின் இலக்கியத் தடம் -11
- குப்பு
- ரகசியம் பேசுதல் – ‘அம்மாவின் ரகசியம்’ நாவலுக்கான முன்னுரை
- பிராயசித்தம்
- கிருஷ்ண சரித்திரம் அத்தியாயம் 11 காண்டவ வனம்
- பம்ப்
- La Vie en Rose (பிரான்ஸ், இயக்குநர் – ஒலிவியர் டஹன்)
- ‘ என் மோனாலிசா….’
- கவிஞர் வ. ஈசுவரமூர்த்தியின் கவிதையில் மறுமலர்ச்சி சிந்தனைகள்
- சீதாயணம் நாடகம் -9 படக்கதை -9
- ஆனாவும் ஆவன்னாவும் !-திரு பி ஏ கிருஷ்ணன் எழுதிய அறிவியலும்தொழில் நுட்பமும் ஒன்றா என்ற கட்டுரையின் எதிர்வினை
- வால்ட் விட்மன் வசனக் கவிதை – 51 ஆதாமின் பிள்ளைகள் – 3 (Children of Adam) அடிமைச் சந்தைகள்
- ஜெயமோகனின் “வெண்கடல்” – வாழ்வின் வெளிச்சங்கள்
- புதிய தளம் சஞ்சிகை வெளியீடும் ஆய்வும்
- மருமகளின் மர்மம்-5
- தமனித் தடிப்பு – Atherosclerosis
