சுவீகாரம்

பொத்தி பொத்தி

வளர்த்தாள்

ஒன்று தறுதலையாகும்

இன்னொன்று தமிழ் வளர்க்கும்

என்று

நினைத்துப் பார்த்திருக்க மாட்டாள்

அவளுக்கு வேண்டுமென்று

ஒரு கவளை சோற்றையாவது

தட்டில் எடுத்து வைத்ததில்லை

நாங்கள்

வளர வளர

சுமையை பகிராமல்

மேலும் பாரமானோம் அவளுக்கு

இரத்தத் திமிரில்

வம்பை வீட்டுக்கு கொண்டுவர

ஒரு நாளும் எங்களுக்கு

பரிந்து பேசாமல்

இருந்ததில்லை அவள்

எந்த வேலையிலும் நிலைக்காது

சொந்தமயாய் தொழில் வைத்தோம்

ஒரு காசு வட்டியில்

அசலையும் வட்டியையும்

சேர்த்து சுமந்தாள்

வாழ்க்கை

யார் காலையும்

வாராமல் விட்டதில்லை என்பாள்

உணர்ந்து சொல்கிறாள்

என்று உணராமல்

வயிறு வளர்த்துக் கொண்டிருந்தோம்

நாங்கள்.