சாம்பல்

This entry is part 2 of 7 in the series 26 ஜூன் 2022

 

 

 

அந்த வீட்டின் பெயரே

கோழிக்குஞ்சு வீடுதான்

வீடு நிறைய கோழிகள்

 

பஞ்சுக்குஞ்சுகள் பின்தொடர

இதோ சாம்பல்நிறக் கோழி

எல்லாக் கோழிக்குமே

தாய்க்கோழி சாம்பல்தான்

 

குஞ்சுக் காலங்களில்

சாம்பலின் முதுகு பல்லக்கு

றெக்கைகள் குடைகள்

மிதிகள் ஒத்தடங்கள்

 

குஞ்சுகளுக்காகவே

குப்பை கிளறும் சாம்பல்

பொறுக்கும் குஞ்சுகள்

பொறுமை காத்து

பொறுக்கும் சாம்பல்

 

சோளம் சோறு

பயறு பருப்பு

கறி மீன் கழிவு

சோற்றுக்கஞ்சித் தவிடு

பிள்ளைகள் முடித்ததும்

இருந்தால் உண்ணும் சாம்பல்

 

சகோதரங்களைக் கொத்திவிரட்டும்

திமிர்பிடித்த அந்த கறுப்புக்கோழியை

பருந்தின் கிடுக்குப்பிடியிலிருந்து

காப்பாற்றியது சாம்பல்தான்

 

வெருகுப்பூனை கீரி

அரவம் கேட்டால்

கேவி விரட்டும் சாம்பல்

சாகத்துணியும் சாம்பல்

 

இன்று

 

சாம்பல் கிழடாகிவிட்டது

அடையும் நேரம் அதிகம்

மேயும் நேரம் கொஞ்சம்

அதன் தாய்மை, பொறுமை

தியாகம் கருணை எல்லாம்

மறக்கப்பட்டுவிட்டன

 

உயிர்த்தாய் சாம்பல்

உபரியாகிப் போனது

சாம்பலாகு முன்னேயே

சாம்பலாகிவிட்டது

சாம்பல்நிறக்கோழி

 

அமீதாம்மாள்

Series Navigationஓர் இரவில்புதுக்கோட்டை புத்தகத் திருவிழா 2022 – இலக்கிய விருதுகள்
author

அமீதாம்மாள்

Similar Posts

Leave a Reply

Your email address will not be published. Required fields are marked *