வெண்சங்கு ..!

This entry is part 3 of 25 in the series 5 அக்டோபர் 2014

பொங்கும் ஆசைகள்
பூம்புனல் மனசுக்குள்
வானமென விரிந்த
கண்கள் கொண்ட
ஞாபகப் பொக்கிஷங்கள்

அனைத்து உணர்வுகள்

சுமந்த உயிர் மூச்சுக்கள்

பாசி படிந்த சங்குகள்

மண் படிந்த சிப்பிகள்

கடல் நுரையின் பூக்கள்

நட்சத்திர மீன்கள்

கண் முழிக்கும் சோழிகள்

பவழப் பூங்கொத்துக்கள்

உல்லாசச் சுற்றுலாவில்

உன் பாதம் பட்டு நகர்ந்ததும்

என் உள்ளங்கையில்

சிக்கிய கூழாங்கற்கள்
பட்டாம் பூச்சியின்
ஒற்றை இறக்கையின்

இறைவன் வரைந்த
அழகோவியம்

‘குட்டிபோடும்’ நம்பிக்கையில்

மயிலிறகின் ஒற்றைக்கம்பி

அரச மரத்தின் காய்ந்த இலை

காக்காப்பொன்னு
கலர்கலரா குமரிமண்ணு

நானிருக்கும் வரை

என்னோடிருக்குமென

நான் புதைத்து வைத்த

சின்னங்கள் …!

என்று என் வாழ்க்கை

பாதைமாறிப் பயணித்ததோ

ஆழ்கடல் மனசில் இருந்தவை

அலைகடலுக்குள் அஸ்தியெனக்

கலந்து விட

என்றாவது எங்காவது

கரையோரம் கால் நனைக்கும்

உன் பாதங்களில்

சிக்கும் இந்த வெண்சங்கு ..!

ஜெயஸ்ரீ ஷங்கர்…..

Series Navigationசுத்த ஜாதகங்கள்அழியாச் சித்திரங்கள்