வெளி
அனைத்தையும்
உள்ளடக்கி இருக்கிறது
உள்ளக்கிடக்கையை
முகிலாகித் தணித்தது
கூண்டுப் பறவை
இறக்கையைக்
கோதிக் கொள்ளும்
வான விதானத்தைப்
பார்த்தபடி
கருடன் நிழலைக் கண்டு
அஞ்சும் கோழிக் குஞ்சுகள்
பரிதி முளைக்கும் வானம்
தங்க நிறத்தில் மின்னும்
ஒரு மிடறு நீர்
உள்ளே சென்றவுடன்
உடல் ஆசுவாசம் கொள்ளும்
மழையின் ரூபம்
விழும் இடத்தைப் பொறுத்து
மாறும்
ருசி கண்ட பூனை
நடுநிசியில் பாத்திரத்தை
உருட்டும்.