கிளைகளின் கதை

கிளைகள் ஒவ்வொன்றும்

தன் நினைவுகளை

பகிர ஆரம்பித்தன

தழைகளை கடித்த ஆடுகள்

கல்லெறிந்த கார்த்திக் சிறுவன்

காதல் பேசிய சரவணன் துர்கா

அழுது தீர்த்த செல்லம்மா

திருடியதை புதைத்த கதிரவன்

பிள்ளை பெற்ற லட்சுமி

என எல்லா கிளைகளும்

தங்கள் நினைவுகளை சொன்ன பிறகு

மிச்சமிருந்த

கடைசி கிளை

எதுவும் சொல்லவில்லை

அநேகமாய் அது

வெட்டியவனின் பெயரை அறிந்திருக்கும்