கலில் கிப்ரான் கவிதைகள் (1883-1931) மீட்சி (The Return) (கவிதை -47 பாகம் -4)

மூலம் : ஓவியக்கவி கலில் கிப்ரான்
தமிழாக்கம் : சி. ஜெயபாரதன், கனடா

“துயர் அடையும் என் தோழனே ! வாழ்க்கையில் உன்னைத் தோல்வியுறச் செய்த வாய்ப்புக் கேடுகளை நீ சிந்தித்தால் அவைகளே உனக்கு வலுவைத் தந்து உன் இதயத்துக்கு ஒளியூட்டி உனது ஆத்மாவைக் பள்ளத்திலிருந்து உயர்த்தி மதிப்புப் பீடத்துக்கு ஏற்ற உந்தி இருக்கிறது. அதனால் உன் பங்குப் பணி நிறைவேறியது என்று திருப்தி அடையவும் அவையே உனக்கு அறிவு புகட்டி ஞானத்தைப் பெறவும் ஒரு மரபுரிமை வழியாக வந்திருப்பதாய் நினைத்துக் கொள்.”

கலில் கிப்ரான் (அன்பு மயமும் சமத்துவமும்)

இயற்கை விதிகளுக்கு
இணங்கிய படிதான்
இப்புவியில்
இருப்பவை எல்லாம்
இயங்கி வரும் !
இயற்கை விதிகளி லிருந்து
விடுதலைக் கிளர்ச்சியின்
விளிப்பும் வேட்கையும்
வெடிக்கிறது !

ஆத்மாவைக் ஈர்ப்பது
அழகுத்துவம் !
அளிப்பதற்கு முன் வந்து அது
களிப்படைவது !
அபகரிக்க முயலாதது !
அழகுத் துவத்தை நீ
அண்டும் போது
உள்ளத்தின் உள்ளே
ஆழத்தில் இருக்கும் கரங்கள்
நீட்சி அடையும்
இதய அரங்கிற்குள்
எட்டிப் பார்க்க !

அழகுத்துவம்
இன்பமும் துயரமும் கலந்த
மகத்துவம் !
காணும் போது கண்ணுக்கு
பூரண மாகக்
புலப்படாது !
புரிந்து கொள்ள உளவினால்
வெறிதாய்ப் போவது !
காதில் படும் போது
ஊமை யாய் ஆக்குவது !
புனிதத்திலும்
புனித மாய் உள்ளது
உன்னுள்ளே உதய மாகி
கற்பனா சக்தியை மீறி
அப்பால்
இறுதி அடைவது !

ஒளியை நேசிக்கும்
ஒருவனை
ஒளியே நேசிக்கும் !
நித்திய ஆத்மா
எப்போதும்
நிறைவு பெறுவ தில்லை !
உச்சத்தைத் தேடி அடைய
இச்சை யுறுவது
எப்போதும் !
ஓர் உண்மை சொல்வேன் :
உயர்ந்த சிந்தனைக்கு உள்ளது,
ஓர் உன்னத இடம்
கண்ணுக்குப் புலப்படும் இந்த
மண்ணை விட !

(தொடரும்)
+++++++++++++

தகவல் :

1. The Prophet By : Kahlil Gibran, Published By : Senate (2003)

2. The Prophet By : Kahlil Gibran Published, By Wordsworth Editions Ltd. (1996)

3. Tears & Lauhgter By : Kahlil Gibran, Published, By : Castle Books (1993)

4. The Voice of The Master By : Kahlil Gibran Translated from Arabic By : Anthony Ferris (1967)

5. Thoughts & Meditations By : Kahlil Gibran Translated from Arabic By : Anthony Ferris (1968)

For further information:
The Prophet By Kahlil Gibran :

http://www.katsandogz.com/gibran.html
http://en.wikipedia.org/wiki/Khalil_Gibran

http://www.inner-growth.info/khalil_gibran_prophet/main.htm

Kahlil Gibran Art Gallery :
http://www.inner-growth.info/khalil_gibran_prophet/html/galleries/gibran_gallery1.htm

*********************
S. Jayabarathan [jayabarat@tnt21.com] (August 9, 2011)