குழந்தைகளும் மீன்களும்

கு. அழகர்சாமி

(1)

கண்ணாடித் தொட்டிக்குள் நீரில்

கலர் கலராய் நீந்தும் மீன்கள்

கண்டதும் கல கலவென்று

குதித்துத் துள்ளும்

நிலம் துள்ள–

குட்டிக் குட்டி

மீன்கள்-

குழந்தைகள்!

(2)

தூண்டிலில் பிடிபட்ட மீன்

துள்ளி விழும்

தரையில்.

துடி துடிக்கும்;

துவளும்.

மெல்ல

அடங்கும்.

மெதுவாய்க் குழந்தை

தொடும்-

மூடிய

விழிகள் திறந்து-

தரை மீது கடைசியாய்த் துள்ளி

மலங்க நோக்கும் குழந்தையின்

விழிக் கடலில்

கடைசியாய்

நீந்தும்

மீன்.