தமிழின் முதல் இணைய வாரப்பத்திரிகை

11 நவம்பர் 2018

ஒரு நூற்றாண்டுக் கழிவுகள்

எஸ்.எம்.ஜுனைத் ஹஸனீ

ஒரு நூற்றாண்டு
தன் கடனை கழித்து விட்டிருந்தது
காலச் சக்கரத்தில் ஒரு பல்
புதியதாய் முளைத்திருந்தது
நூற்றாண்டுச் சாயமாய்
அநேக தேசியச் சின்னங்கள் தோறும்
சிகப்புத் திட்டுக்கள் தெறித்திருந்தன
ஜன ரஞ்சகத்தின் நிகராய்
கடவுள்களும் பெருத்திருந்தார்கள்
கழிந்த யுகத்தின் சில காவியுடைகள்
கண்ணாடிப் பெட்டகங்களில் பத்திரமாயின
எப்படி நேசிப்பதென்றும்
எங்ஙனம் சுவாசிப்பதென்றும்
கட்டணமேற்றுக் கற்பித்தன
கலாசாலைகள்
இன்னமும் இவ்வுயிர் தாங்கி நிற்கும்
இப்பூத உடலிற்கான வாழ்வாதாரங்கள்
அமெரிக்க ஏகாபத்தியங்களென்றும்
சுவாச நாளங்களுக்கான கருப் பொருட்கள்
யூரோவும் டாலருமென
பாடப்பபுத்தகங்களில் பிரசுரமாயின
விரல் நீளா பொடிசுகளிடமெல்லாம்
ஆயுதங்கள் நீண்டிருந்தன
ஊரோரத்திய பள்ளிகள் முடக்கப்பட்டு
ஆயுதத் தளவாடங்கள் முடுக்கப்பட்டன
பச்சையங்கள் மிளிர்ந்து நிறைந்த
வனாந்திரக் காடுகளிலெல்லாம்
கரியமில எந்திரக் குழாய்கள்
இரைச்சலுற்று வெளிநீட்டிக் கிடந்தன
இன்னமும் தங்களைச் சீண்டிராத
மனிதத்துவ மாண்புகளையெண்ணி
நிம்மதிப் பெருமூச்சிட்டுக் கொண்டன
சூரியனும் நட்சத்திரங்களும்.

எஸ்.எம்.ஜுனைத் ஹஸனீ

Series Navigationமலைபேச்சு – செஞ்சி சொல்லும் கதை – 7நிழல் வலி

Leave a Comment

Archives