வையவன்

எல்லாக் கைதிகளுமே
சின்னஞ்சிறு சிசுக்களாகத்தான்
தென்படுகிறார்கள்
தூங்கும் போது
கைமடித்து ஒருக்களித்து
கவிழ்ந்து மல்லாந்து
கருப்பைக்குள்ளும் வெளியிலும்
ஒரு பாவமும் அறியாது
இருந்த அதே நிலையில்..
துயிலின் தாலாட்டில்
துவண்டு போன தோற்றத்தில் ..
காவலர், நீதிபதி , வழக்கறிஞர்
தண்டனை, பாதிக்கப்பட்டோர்
மற்றும் தம் குடும்பம்
என்று வளரும் சமூகத்தில்
அடப் பாவிகளா என்ற
சாபம் உறங்குவோருக்குக் கேட்காது
விழித்தபின் தான் வெளிப்படுவான்
மூத்து முற்றி முதிர்ந்த
அந்த ஆதி மனிதன்
சற்றே நீடிக்கட்டும்
இந்த இடைவேளை