மேடம் மோனிகாவின் வேடம் (Mrs. Warren’s Profession) நான்கு அங்க நாடகம் (இரண்டாம் அங்கம்) அங்கம் -2 பாகம் -9

 மேடம் மோனிகாவின் வேடம் 
(Mrs. Warren’s Profession) 
நான்கு அங்க நாடகம்

(இரண்டாம் அங்கம்) 
அங்கம் -2 பாகம் -9
 

ஆங்கில மூலம் : ஜார்ஜ் பெர்னாட் ஷா
தமிழாக்கத் தழுவல் : சி. ஜெயபாரதன், கனடா

பரத்தைமைத் தொழிலுக்கு மெய்யான காரணம் பெண்டிரின் சீர்கெட்ட பாதையல்ல !  ஆடவரின் ஆதிக்கப் போதையல்ல !  ஏழ்மை, வறுமை, இல்லாமை, பசி பட்டினி, தனிப்படுதல், வேலையின்மை, முறிந்த குடும்பம், சமூகப் புறக்கணிப்பு, பெற்றோர் புறக்கணிப்பு, வன்முறைக் கற்பழிப்பு, கட்டாய அழுத்தம் போன்ற சமூக இடையூறுகளே அப்பாவிப் பெண்டிரை மீளாத பரத்தைமைச் சிறையில் தள்ளி விடுகின்றன.

பெர்னாட் ஷா (Preface to Mrs. Warren’s Profession Drama)

ஜார்ஜ் பெர்னாட் ஷா அயர்லாந்தின் தலைநகர் டப்ளினில் 1856 ஆம் ஆண்டில் ஜார்ஜ் கார் ஷா & லுஸிண்டா எலிஸபெத் ஷா இருவருக்கும் பிறந்தவர்.  அவரது அன்னை ஆப்ரா (Opera) இசையரங்குப் பாடகி, வாய்க்குரல் பயிற்சியாளி. தந்தையார் தோல்வி யுற்ற வணிகத்துறையாளர். வறுமையி லிருந்து குடும்பத்தை விடுவிக்க முடியாத பெருங் குடிகாரர்.  இருபது வயதில் பெர்னாட் ஷா அன்னையுடன் லண்டனுக்குச் சென்றார்.  அங்கே தாயார் இசைத்தொழில் மூலம் ஊதியம் பெற்றுக் குடும்பத்தை நடத்திக் கொண்டு வந்தார்.  நிரம்ப இலக்கிய நூற் படைப்புகளைப் படித்து வந்த பெர்னாட் ஷா, முதலில் ஐந்து தோல்வியுறும் நாடகங்களை எழுதினார்.  பிறகு நாடக மேடை உலகில் புகுந்து மற்றவர் நாடகங்களை விமர்சனம் செய்து 1894 இல் “சனிக்கிழமை கருத்திதழில்” (Saturday Review) நாடகங்களைப் பற்றித் திறனாய்வு செய்து வந்தார். அப்போது பொதுவுடைமைக் கோட்பாடில் ஈடுபாடு மிகுந்து பிரதம மேடைப் பேச்சாளாராகவும் உரைமொழி ஆற்றினார்.

அவர் எழுதிய சிறப்பான நாடகங்கள்: பிக்மாலியன் (Pygmalion), ஜோன் ஆ·ப் ஆர்க் (Saint Joan), மனிதன் & உன்னத மனிதன் (Man & Superman), ஆப்பிள் வண்டி (The Apple Cart), டாக்டரின் தடுமாற்றம் (The Doctor’s Dilemma), மெதுசேலாவுக்கு மீட்சி (Back to Methuselah), மேஜர் பார்பரா (Major Barbara), கோடீஸ்வரி (Millionairess), இன்பியல் நாடகங்கள் (Plays Pleasant), துன்பியல் நாடகங்கள் (Plays Unpleasant), தூயவருக்கு மூன்று நாடகங்கள் (Three Plays for Puritans), நெஞ்சை முறிக்கும் இல்லம் (Heartbreak House), ஆயுத மனிதன் (ஊழ் விதி மனிதன்) (The Man of Destiny) (1898), மிஸிஸ் வார்ரனின் தொழில் (Mrs. Warren’s Profession) (1893) போன்றவை.  ஐம்பது ஆங்கில நாடகங்கள் எழுதிய பெர்னாட் ஷாவுக்கு 1925 இல் இலக்கிய நோபெல் பரிசு அளிக்கப்பட்டது.

மேடம் மோனிகா வார்ரன் நாடகத்தைப் பற்றி :

[தமிழில் எழுதப் பேசும் வசதிக்காக பெர்னாட் ஷாவின் நாடகப் பெயர்கள் சிலவற்றை நான் எளிதாய் மாற்றி இருக்கிறேன்.]

பெர்னாட் ஷா நாடகத்தின் அடிப்படைக் கருத்து இதுதான் :  ஏழ்மையாலும், சமூகப் புறக்கணிப்பாலும், தனிப்படுவ தாலும், இல்லாமையாலும், வேலையின்மையாலும் சில மாதர் பரத்தையர் தொழில் சிக்கிக் கொள்கிறார் என்பதாக பெர்னாட் ஷா தன் நாடக முன்னுரையில் கூறுகிறார்.  மிஸிஸ் மோனிகா வார்ரன் ஒரு நடுத்தர வயது மாது.  உயர்தரப் பரத்தையர் மாளிகையை மேற்குடிச் செல்வந்தருக்கும், சமூகச் செல்வாக்கு மாந்தருக்கும் நடத்தி வரும் உரிமையாளி. நளினமும், நாகரீகமும் கவர்ச்சி மேனியும் கொண்டவள். மோனா லிஸா போன்று பார்க்க ஓர் அழகிதான். அவளுக்கு விவியன் என்றொரு வாலிபப் புதல்வி. மகள் கேம்பிரிட்ஜ் யுனிவெர்சிட்டி பட்டதாரி. அவளது கல்லூரிப் படிப்புக்குத் தொடர்ந்து பணத்தை அனுப்பிய அவளது அன்னை எப்படிப் பணம் சம்பாதிக்கிறாள் என்று தெரியாமல் இருக்கிறாள்.  அந்த இரகசியம் தெரிந்ததும் விவியன் வெகுண்டு, வெடித்து அன்னையைத் திட்டி அறவே வெறுக்கிறாள்.  தாய் சிறு வயதில் வறுமைப் பிடியில் பட்ட துயர்களைக் கூறிப் பரத்தையர் தொழிலில் தான் தள்ளப் பட்ட காரணத்தை விளக்குகிறாள்.  மகளால் அதை ஏற்றுக் கொள்ள முடியவில்லை. தர்க்கத்தின் முடிவில் உடன்பட ஒருவரும் இயலாது இருவரும் தாம் விரும்பும் தனித்தனிப் பாதையில் போகிறார்.  மோனிகா தன் பரத்தையர் தொழிலைத் தொடர்கிறாள்.  தாயைப் போல பிள்ளை என்பார் சிலர். ஆனால் விவியன் ஒரு விதி விலக்கு மங்கை.  அவள் அன்னையைப் போலின்றி ஒரு கௌரவத் தொழிலில் உழைத்துச் சம்பாதிக்க ஈடுபடுகிறாள்.

மிஸிஸ் வார்ரனின் தொழில் நாடகத்துக்குத் தடை உத்தரவு

1893 இல் எழுதிய பெர்னாட் ஷாவின் நாடகம் 1925 ஆண்டுவரை அடுத்தடுத்துத் தடை செய்யப்பட்டு இங்கிலாந்தில் அரங்கேறாது முடங்கியே மூலையில் கிடந்தது. பிரிட்டனின் அக்கால அரங்க மேடை அதிபரரான லார்டு சேம்பர்லின் “மிஸிஸ் வார்ரனின் தொழில்” நாடகத்தை எந்த நகரிலும் அரங்கேற்றக் கூடாது என்று தடை உத்தரவு போட்டார்.  காரணம் அந்த நாடகம் பரத்தையர் தொழிலைப் பற்றிக் காட்டி ஆடவரையும், மாதரையும் இழிவு செய்கிறது.  பரத்தையர் தொழில் நாட்டில் ஊன்றி வளர்வதற்கு மூல காரணமே சமூகம் தான் என்பது நாடகக் காட்சியாக வெளியாவது அப்போது வரவேற்கப் படவில்லை.  1902 ஆண்டில் லண்டனில் உள்ள “நியூ லிரிக் கிளப்” தன் உறுப்பினர் மட்டும் பார்க்க அந்த நாடகம் முதலில் அரங்கேறியது.  1905 இல் நியூ யார்க்கில் “மிஸிஸ் வார்ரன் தொழில்” நாடகம் முதன்முதல் அரங்கேறிப் பாதியில் போலீசார் குறுக்கிட்டு நடிகர் குழுவினர் கைது செய்யப் பட்டனர். பொதுநபர் ரசிக்க 1925 ஆண்டில்தான் அதை லண்டன் நாடக அரங்குகள் மேடையில் காட்ட முன்வந்தன.

பரத்தைமைத் தொழில் (Prostitution) பற்றி பெர்னாட் ஷாவின் கருத்துகள்

பெர்னாட் ஷா 1893 இல் “மிஸிஸ் வார்ரனின் தொழில்” என்னும் நாடகத்தை எழுதினார்.  அது பரத்தைமைத் தொழலில் ஈடுபட்டு ஊதியம் சம்பாதிக்கும் மிஸிஸ் வார்ரனைப் பற்றியது. அந்த வெறுப்புத் தொழிலில் கிடைத்த பணத்தை மகளுக்குத் தெரியாமல் சேர்த்து மகளைப் பட்டப் படிப்பில் ஏற்றி வளர்த்த நிகழ்ச்சியே நாடகத்தின் ஆணிவேராய் அமைந்துள்ளது.  இறுதியில் அதை அறிந்து கொண்ட மகள் ஆவேசம் கொண்டு அன்னையைப் பிரிவதே நாடக உச்ச முடிவாக எழுதப்பட்டுள்ளது.

மிஸிஸ் வார்ரன் உட்பட பரத்தைமைத் தொழிலில் பங்கு கொண்ட மற்றவரும், அவளது ஆசை நாயகரும் கண்ணியமாக காட்சி அளித்துப் போவதாய் பெர்னாட் ஷா காட்டி இருக்கிறார்.  இந்த கசப்பு நாடகத்தை தடை செய்யத் தகுதியுள்ள ஆபாச நடைப் போக்குகள், முரண்பாடுகள் எதுவும் வசனங்களில் இல்லை.  பரத்தைமை பற்றிய ஆபாசக் காட்சிகள், அமங்கலச் சொற்கள், அதிர்ச்சி வரிகள் எவையும் நாடகத்தில் எங்கும் காணப் படவில்லை. நாடக வசனங்களை இரட்டைப் பொருளில் பெர்னாட் ஷா எழுதி இருப்பது திறமையான நவீன நடைப் போக்காக திகைக்க வைக்கிறது.

பரத்தையர் தொழில் மாளிகை வைத்து நடத்தும் மிஸிஸ் வார்ரன் முரண்பாடு நாடகத்தை பெர்னாட் ஷா எழுதியதின் நோக்கம் என்ன ?  பரத்தைமைத் தொழிலின் மெய்யான காரணம் பெண்டிரின் சீர்கெட்ட நெறிகள் அல்ல !  ஆடவரின் ஆதிக்க வன்முறை வெறிகள் அல்ல !  வறுமை, ஏழ்மை, பசி, பட்டினி, தனிமை, வேலையின்மை, சமூகப் புறக்கணிப்பு, முறிந்த குடும்பம், வன்முறைக் கற்பழிப்பு, கட்டாயத் தொழில் அழுத்தம் போன்ற சமூக இடை யூறுகளே அப்பாவிப் பெண்டிரை மீளாத பரத்தைமைச் சிறையில் தள்ளி விடுகின்றன என்று பெர்னாட் ஷா தன் நாடக முகவுரையில் கூறுகிறார்.

**********************

நாடக  உறுப்பினர்

1. மேடம் மோனிகா வார்ரன் [Mrs. Kitty Warren] (45 வயது)
2. மிஸ் விவியன் வார்ரன் – [Ms. Vivie Warren] மோனிகாவின் ஒற்றை மகள் (வயது : 22)
3. பாதிரியார் சாமுவெல் கார்டுநர் [The Rev. Samuel Gardner] (வயது : 50)
4. பிராங்க் கார்டுநர் [Frank Gardner], விவியனின் காதலன் & சாமுவெல் பாதிரியாரின் மகன் (வயது : 20)
5. வில்லியம் பவல் [Praed] (நடுத்தர வயது) : மேடம் மோனிகாவின் கூட்டாளி
6. ஜார்ஜ் வாலஸ் (Sir George Crofts) (50 வயது) : மேடம் மோனிகாவின் தோழன்.

************************

மேடம் மோனிகாவின் வேடம்
(Mrs. Warren’s Profession)

நான்கு அங்கங்கள்

(இரண்டாம் அங்கம்)
அங்கம் -2 பாகம் -9

இடம்:  ஹாஸ்லிமியர், ஸுர்ரி, இங்கிலாந்து
நடந்த ஆண்டு : 1893
காலம் :  வேனிற் கால இரவு

அரங்க அமைப்பு:  மிஸ் விவியனின் தோட்ட மாளிகை. வீட்டில் விளக்கு வெளிச்சம் உள்ளது. இருளில் கதவைத் திறந்து கொண்டு உள்ளே மோனிகா நுழைகிறாள்.  கூட ஃபிராங்க் வருகிறான்.  வெளியே நடந்து களைத்துப் போய் சோபாவில் அமர்கிறான். அவர்கள் பேசிக் கொண்டுள்ள போது, பாதிரியார், வாலஸ் நுழைகிறார்.  அதன் பின் உலவச் சென்ற விவியனும், வில்லியமும் வருகிறார்.  எல்லோரும் சப்பருக்கு அழைக்கப் படுகிறார்.  உண்ட பிறகு ஜார்ஜ் வாலஸ் தான் விவியனை மணந்து கொள்ள விரும்புவதாக மேடம் மோனிகாவிடம் தனியாகக் கூறுகிறார்.  விவியன் தன் தந்தை யார் என்று கேட்கிறாள்.  மோனிகா பதில் சொல்ல மறுக்கிறாள்.  ஒரு பெண் தன் சுயத் தேவைகளுக்கு செல்வந்த ஆடவன் ஒருவனை வசப்படுத்தி அவனுடன் வாழ வேண்டும் என்று தாய் அறிவுரை கூறுகிறாள்.

(முன்வாரத் தொடர்ச்சி)

மிஸ். விவியன்:  நீ அவ்விதம்தான் வாழ்ந்து பணக்காரியானாய் அல்லவா ?  ஆனால் அவ்வழியில் பணம் திரட்டுவது தவறு, அது ஒரு பெண்ணின் பண்பாடில்லை என்று உனக்குத் தெரியாதா ?

மேடம் மோனிகா:  தினமும் பசி, வறுமை உன்னைத் தின்னும் போது பண்பு உன்னை விட்டு நழுவிச் செல்கிறது.  படிப்பும், வேலையும் இல்லாத மாதருக்கு வயிறு நிரம்ப வேறு வழியில்லை. பணத்திற்கு உடலை விற்பது மாதரின் இறுதிப் பாதை !  குவியும் போது அவ்வழியில் மழைபோல் பணம் கொட்டுது.  வயிற்றை நிரப்ப தினம் ஏதாவது ஒரு வேலை தேவை. வேலை செய்து பிழைக்க பலருக்கு விருப்பம் இருப்ப தில்லை.  விருப்ப மில்லாத ஒருசில ஆடவருக்கு உடலின்பம் அளிப்பது, ஒரு பெண்ணுக்குக் களிப்பான வேலை இல்லை.  மிகவும் களைப்பான வேலை. கசப்பன வேலை.  அதுவும் இயல்பான வேலை ஆகுது ஒரு வயிற்றை நிரப்பும் போது.  இது தவறாக நியாயம் செய்யப் படுகிறது என்று நீ நிராகரிக்கலாம்.  அந்த நிலைக்கு ஒருத்தி சரிந்த பிறகு, மேலேறும் வழி தெரிவ தில்லை.  அது மீளா நரகம் ஒரு பெண்ணுக்கு !  சிலர் குடிகாரர், அவரில் சிலர்  பெண்ணை அவமதிப்பவர். அடிப்பவர் உதைப்பவர், வீட்டை விட்டுத் துரத்தாமல் கால் மிதிக்க ஒரு வாசல் விரிப்பாய் வைத்திருப்பவர்.  வீட்டு ராணி இருந்தாலும் சரி, இல்லா விட்டாலும் சரி, வேறு பெண்டிர் உறவுக்கு அலைபவர் பலர் இருக்கும் வரை இத்தொழில் நீடிக்கும்.  இது புராதனத் தொழில்.  இத்தொழில் அழியாது, நீங்காது. விரட்டினாலும் வேறிடத்தில் குடிபுகும் தொழில் இது !  பெண்ணுக்கு இது பிடித்தும் பிடிக்காத ஒரு தொழில் !  இது சமூகத்துக்குப் பிடிக்காமல் பிடிக்கும் தொழில்.  கண்ணுக்குத் தெரிந்தும் தெரியாமலும் நாட்டில் வளர்ந்து வரும் பூர்வீகத் தொழில் இது.  மருத்துவப் பணிப் பெண்டிர் போல், பணத்துக்கு இவரது தொழிலும் ஆடவருக்குச் செய்யும் ஒருவகைச் சேவை தான்.  எந்தப் பெண்ணும் விரும்பிச் செய்யும் தொழில் இல்லை இது.  இது வெறுக்கத் தக்க மனிதத் தேவையே ! பலர் நினைப்பது போல் இத்தொழில் ஒரு பூப்படுக்கை அல்ல !

விவியன்:  அத்தொழிலை மாதருக்கு ஏற்ற தொழில் என்று இன்னும் நீ  கருதுகிறாயா ?

மேடம் மோனிகா:  வேறு வழியற்ற ஏழை மாதருக்கு விரும்பாத தேவை என்றுதான் நான் சொல்வேன்.  ஆனால் அவள் வாலிபம் பொங்கி எழில் மாதாய் இருக்க வேண்டும்.  கொஞ்சம் அறிவுள்ள மடந்தையாகவும் இருப்பது நல்லது. இந்த வேலை மற்ற வேலைகளை விட அவளுக்கு மேலானது, அவள் நிலையைப் பொருத்து.  அப்படித்தான் ஏழைச் சமூகம் வாழ வேண்டும் என்று நான் சொல்ல மாட்டேன்.  ஏழைகளுக்குச் சமூகத்தில் வேறு என்ன வாய்ப்புகள் உள்ளன சொல் ?  அது தவறான பாதைதான்.  சரியோ, தவறோ ஒரு மாது அதில் பெரும் பயனைத் தானடைய முயல வேண்டும்.  மேல்மட்ட மாதருக்கு இத்தொழில் தேவை யில்லைதான்.  ஆனாலும் மேநிலை விலை மாதரும் இத்தொழிலில் ஈடுபட்டு வருகிறார். ஏழையரின் தோழமைத் தொழில் இது !  நான் இதைத் தவிர வேறோர் தொழிலை மேற்கொண்டிருந்தால் நானொரு முட்டாளாய் என்னைக் கருதுவேன்.

விவியன்:  (மனம் வருந்தி)  அன்னையே !  ஒருவேளை நாமிருவரும் ஏழை யாக இருந்திருந்தால், வாடர்லூ மது ஹோட்டலில், தினல் நாலு ஷில்லிங் பெறும் மது விற்பனைப் பெண்ணாய் நான் வேலை செய்ய நீ எனக்கு அறிவுரை கூறுவாயா ?

மேடம் மோனிகா:  (பெருங் கோபத்துடன்)  நிச்சயம் கூற மாட்டேன் உனக்கு !  என்ன மாதிரித் தாயாய் நீ என்னை நினைக்கிறாய் ?  பசியும், வறுமையும் பாதிக்கும் நீ எப்படிச் சுயமதிப்புடன் வாழ முடியும் ?  ஒரு வாலிப மாதின் மதிப்பென்ன, மனித வாழ்வின் மதிப்பென்ன சொல் சுய மதிப்பின்றி ?  உன்னைப் போன்ற மற்ற வாலிபப் பெண்கள் வறுமைப் புழுதியில் புரளும் போது, நான் ஏன் தனி மாதாய் உழைத்து என் மகள் உயர்ந்த பட்டம் படிப்புக்குப் பண உதவி செய்ய வேண்டும் ?  காரணம் நான் கட்டுப்பாடும், சுய மதிப்பும் கொண்டவள்.  அதனால் நான் தரை துடைச்சி, பாத்திரம் கழுவி நாள் ஒன்றுக்கு ஆறு பென்ஸ் வாங்கி எனக்கு எதிர்காலம் இருண்டு போய் நிகழ் காலத்தைத் தள்ளிக் கொண்டிருந்தேன்.  உலகம் தெரியாத பலர் கூறுவதை நம்பி, நீ அவர் பின்னே செல்லாதே.  நாகரீகமாக உலவ, வறுமையின்றி வாழ நீ யாராவது ஒரு செல்வந்த ஆடவன் கூட ஆசை நாயகியாய் வசிக்க வேண்டும்.  அவனை வசப் படுத்தித் தன்னை மணந்து கொள்ள வழி வகுக்க வேண்டும்.  ஆனால் அவனை விடக் கீழான நிலையில் இருந்தால் அவள் திருமணத்தை எதிர்பார்க்க முடியாது.  பெண் பிள்ளைகள் பெற்ற ஒரு லண்டன் தாய் இதையே தான் தன் புதல்விகளுக்குச் சொல்வாள்.  நான் உனக்கு நேராகச் சொல்கிறேன்.  அவள் தாறுமாறாய்ச் சொல்வாள் !  இதுதான் எனக்கும், பிறருக்கும் உள்ள வேறுபாடு !

மிஸ். விவியன்:  உன் அறிவுரை எனக்குப் புரிய வில்லை !  நான் படித்தவள், பட்டம் பெற்றவள். என் கதை வேறு !  உன் பாதையில் நான் செல்ல வேண்டிய தில்லை.  எனக்கொரு தனிப் பாதையை நான் வகுத்துக் கொள்வேன் தாயே !

(தொடரும்)

***************

தகவல் :

Based on The Play : Mrs. Warren’s Profession By : George Bernard Shaw, – Plays Unpleasant) (1958)

(a) The Portable Bernard Shaw By : Stanley Weintraub (1977)
(b) Writers & Critics – Shaw By A. M. Gibbs (1969)
(c) The Oxford Dictionary of Quotations (New Edition) (1992)
(d) The Wicked Wit of Oscar Wilde (1997)
(e) http://en.wikipedia.org/wiki/Mrs._Warren’s_Profession
(f) http://www.enotes.com/mrs-warrens-profession
(g) The Great Quotations Compiled By : George Seldes (1967)
(h) BBC DVD Video Limited – Bernard Shaw’s Mrs. Warren’s Profession Released in August 2006 (109 minutes)
(i) A Guide to the Plays of Bernard Shaw By : C.B. Purdom (1964)
(j) Major Critical Essays By : Bernard Shaw Penguin Classics (1986)
(k) http://www.online-literature.com/george_bernard_shaw/mrs-warrens-profession/

********************
S. Jayabarathan [jayabarat@tnt21.com] (August 25, 2012)

http://jayabarathan.wordpress.com/