எதிர்பாராதது

வலையில் விழுந்த வண்டு
சிலந்தியைத் தின்றது

கிழட்டுச் சிங்கம்
தலையில் கழுகு

புலிக்குத் தப்பிய முயலைப்
பாம்பு செரித்தது

கவிதைப் போட்டி
வள்ளுவன் தோற்றான்

விழுதுகள் சுருண்டன
ஆல் சாய்ந்தது

மழை கேட்டது மல்லி
பிடுங்கிப் போட்டது புயல்

வெள்ளத்தில் தாமரை
மூர்ச்சையாகிச் செத்தன

கூட்டில் மசக்கைக் குருவி
சுற்றிலும் காட்டுத் தீ

பாரம்பரிய வைர அட்டிகை
பாஷா கடையில்

இலையுதிர் காலம் முடிந்தது
தொடர்கிறது இன்னொரு
இலையுதிர் காலம்

காலைப் புற்களில்
கதிரொளி பட்டதில்
பொசுங்கின புற்கள்

நான் தீட்டிய மோனலிசா
அழுகிறாள்

விதவையாக
ஓர் இரவு வானம்

எதிர்பாராததை எதிர்பார்
ஏமாற்றமே இல்லை

அமீதாம்மாள்