தமிழின் முதல் இணைய வாரப்பத்திரிகை

9 ஆகஸ்ட் 2020

வாழ்க நீ

அமீதாம்மாள்

Spread the love

 

 

சொன்னதைக்

கூட்டிக் கழித்து

நீ சொன்னதில்லை

 

இரகசியங்களை

என் அனுமதியின்றி

நீ அவிழ்த்ததில்லை

 

நீ இல்லாவிட்டால்

ஊனமாகிவிடுகிறேன்

என் உடல் உறுப்பு நீ

 

பசித்தால் மட்டுமே

புசிக்கிறாய்

 

சொடுக்கும் நேரத்தில்

சிரிக்க அழ வைக்கிறாய்

 

உன் சாட்சி போதும்

உலகம் கைகட்டும்

 

நான் கண்கலங்கும்போது

என் கைக்குட்டையாகிறாய்

 

மாயக் கண்ணாடி நீ

ஆசையைச் சொன்னால்

காண்பிக்கிறாய்

 

கண்ணகியின் காற்சிலம்பாய்

எல்லார் கையிலும் நீ

 

மொத்த உறவுகளையும்

முதுகு சொரியும்

குச்சிகளாக்கி விட்டாய்

 

பாவம் உனக்குச்

சொந்தபந்தமில்லை

எடுப்பாருக்கு நீ கைப்பிள்ளை

 

முட்டாள் சேவல் நீ

கூவும் நேரம் உனக்குத்

தெரிவதே இல்லை

 

உன் அகராதியில்

இடம்பொருள்ஏவல் இல்லை

 

என்னைக் கட்டுப்படுத்த நீ யார்?

ஆத்திரம் வந்தது

தூக்கி எறிந்தேன்

 

பிறதுதான் புரிந்தது

எறியப்பட்டது  நான்தானென்று

 

எண்பது கிராம்

என்சைக்ளோபீடியாவே

நீ வாழ்க

 

அமீதாம்மாள்

 

Series Navigationவெளிநாட்டு ஊழியர்கள்வெங்காயம் — தக்காளி !

Leave a Comment

Archives