ஒப்பீடு ஏது?

This entry is part 13 of 17 in the series 27 செப்டம்பர் 2020

முகில்கள் மறைத்த பாதி நிலா

உன் கவச முகம்

இடைவெளி தேவையாம்

பறவையின் சிறகுகளாய்

நாம் இனி

அவர்கள் பார்ப்பது

உடல் உஷ்ணம்

காதல் உஷ்ணம் பார்த்திருந்தால்

தெறித்திருக்கும் வெப்பமானி

தூறலும் வானவில்லும்

தனித்தனி அல்லவே

ஒன்றும் ஒன்றும்

இரண்டு சிலருக்கு

பதினொன்று சிலருக்கு

பெருக்கல் நமக்கு

நாவலாகக் கிடைத்தாய்

அட்டைப் படத்தையே

பார்த்துக் கொண்டிருக்கிறேன்

எப்போது பிரிப்பது

எப்போது படிப்பது

வண்ணங்களும்

தூரிகைகளும் தயார்

இனிமேல்தான் உன்னைக்

கண்டெடுக்க வேண்டும்

இரவுக்காக காத்திருக்கிறேன்

ஓர் ஆந்தையாக

நிலா உன்னைக் காண

வெல்லக்கட்டி நீ

எங்குவேண்டுமானாலும்

ஒளிந்துகொள்

சிற்றெறும்பு அறியும்

உயரே இருந்து

நீராய் நீ விழுந்ததில்

சக்கரமாய்ச் சுற்றினேன்

‘ஷாக்’ அடிக்கிறது

நீ ஒரு பட்டுப்புழு

அந்த உலக அழகியை

உன் எச்சில்தான்

அலங்கரிக்கிறது

சிறுகதை நான்

நீ நுழைந்தாய்

காப்பியமாகிவிட்டேன்

சிவப்பும் பச்சையும்

இருவருக்குமே தெரியும்

இல்லாவிட்டால்

எப்போதோ விபத்து

நடந்திருக்கும்

ட்ரக்கும் காரும் மோதியதில்

காவலர் கூட்டம், கலவரம்

அந்த வண்டுக்கு கவலையில்லை

சாலையோர ஊதாப்பூவை

சுற்றுகிறது

கிணறாக நீ இரு

கிணற்றுத் தவளையாய்

என் ஆயுள் முடியட்டும்

வெயிலும் மழையும்

சேர்ந்தே நிகழ்ந்தால்

காக்காய்க்கும் நரிக்கும்

கல்யாணமாம்

அந்த காக்கை நரி நாம்தான்

எதோடு உன்னை ஒப்பிடுவது

மின்னலும் மின்மினியும் கூட

அற்பமாகிவிட்டன

அமீதாம்மாள்

Series Navigationபரகாலநாயகியும் தாயாரும்புஜ்ஜியின் உலகம்
author

அமீதாம்மாள்

Similar Posts

Leave a Reply

Your email address will not be published. Required fields are marked *