அழியாச் சித்திரங்கள்

அம்மாவிடம் பால் குடித்து

உதட்டில் மிச்சமிருக்கும் வெண் துளிகளுடன்

விளையாடத் தவழ்ந்து வரும்

நடைபாதைக் குழந்தையை

துள்ளிக் குதித்து வரவேற்கிறது

தெருவில் அலையும்

பசுவின் கன்றொன்று….!

***     ***     ***

கை நீட்டும் பிச்சைக்காரிக்கு

ஏதும் தர அவகாசமில்லாமல்

மின் இரயிலைப் பிடிக்கும் அவசரத்தில்

கடந்து போகிறவர்களுக்கும்

கைகளை ஆட்டிச் சிரிக்கிறது

பிச்சைக்காரியின் தோளில் தொங்கும்

பச்சிளங் குழந்தை……!

***     ***     ***

சோறு குழம்பு கூட்டென்று

மண்ணைக் குழைத்து பரிமாறி

அவுக் அவுக் என ராகமிட்டு

பாவணைகளில் தின்று முடித்து

சிதறி ஓடும்

நடை பாதைக் குழந்தைகள்

அம்மாவிடம் போய்

அழுகின்றன பசிக்கிறதென்றபடி….!

***     ***     ***

செப்பு வைத்து சமைத்து

சிறுகுழந்தைகள் பரிமாறும்

மண் சோற்றை மறுக்காமல்

வாங்கிப் புசியுங்கள்;

நட்சத்திர உணவங்களிலும் கிடைக்காத

அபூர்வ உணவு அது…..!

***     ***     ***

காரை பெயர்ந்திருந்தாலும்

வண்ணங்கள் உதிர்ந்திருந்தாலும்

குட்டிக் குழந்தைகள் குடியிருக்கும்

வீட்டின் சுவர்கள் அழகானவை

அவை

குழந்தைகளின்

கரும்பென்சில் கிறுக்கல்களால்

ஆசீர்வதிக்கப்பட்டவை …..!