தோற்றம்

இது நானில்லை

சுனையில் தெரிவது

என் பிம்பம்

 

அப்போது

இது தான் நீயா

என்றான் என் மேல்

சுட்டு விரலை வைத்து

 

இது என் உடல்

அதன் தோற்றம்

 

தோற்றம் நீயில்லை

என்கிறாயா

 

ஆமாம்

 

உன் தோற்றமே

நீயில்லையா

 

என் தோற்றம்

தரும் தாக்கம்

உனக்கு வேறு

ஒரு பெண்ணுக்கு வேறு

என்னிடம் உதவி கேட்டு

வருபவனுக்கு வேறு

எனக்கு உதவி

செய்தவனுக்கு வேறு

 

அது சரி என்றான்

புரிந்தது போல​

 

மரத்தின் அருகே

சென்றேன்

பார் இது

பகலில் நிழலானது

நிலவில்லா இரவில்

அச்சம் தருவது

இதன் தோற்றம்

நம் அச்சம் அல்லது

தேவை கொண்டு

மாறும்

 

பதிலே இல்லை

அவன்

போன​ இடம் தெரியவில்லை

 

மேகம் கவிந்து

வானையே மூடியது

 

பறவைகள் திரும்பியதில்

மெலிதாய்க் கிளைகளை

அசைத்தது மரம்

 

நிழல் நீங்கிய​

தோற்றம்

Series Navigation

அவன், அவள். அது…! -2மருத்துவக் கட்டுரை உயர் இரத்த அழுத்தம்