தொலைந்து போன
ஒத்தை கொலுசில்தான்
ஜானுவின் வாழ்க்கை நீள்கிறது.
முந்தானை முடிச்சில் தொங்கும்
பத்து ரூபாயில்தான்
சிசுக்களின் மூச்சுக்காற்று தொடர்கின்றது.
வறண்டுபோன திண்ணைகளில்தான்
தாத்தாக்களின்
பெருமூச்சு கேட்கின்றது.
பலூன்காரனுக்கு- எப்போதும்
பத்துவீதிகளே போதும்.
பஞ்சு மிட்டாய்க்காரனிடம்
எப்போதும் குழந்தைகள்.
சிவன்கோயில் அய்யருக்கு
தட்டுகளில் ஜீவனம்.
பலாச்சுளை விற்பவனுக்கு
பத்து ஈக்கள் சொந்தம்.
குருட்டு பிச்சைக்காரிக்கு
கோவில் வாசலே சுவர்க்கம்.
வரும்போகும் வாழ்கைக்கு
யாரிடம் கேட்பது முகவரி!.
– ஜெயானந்தன்.
