சொற்களின் வல்லமை

மஞ்சுளா

யாரிடமும்
எதைச் சொன்னாலும்
குறைத்துச்
சொல்ல வேண்டாம்

அதிகம் சொல்லிக்கொள்வது
ஆபத்து
என்றும்
நினைத்து விட வேண்டாம்

அதிகம் சொல்லிக்கொள்ளும் போது
குறைவாக உதடசையுங்கள்

உதடுகள் இணைப்பது
சொற்களை
உங்களையும் என்னையும்
அல்ல

உதடுகள் பிரியும் போது
தெறித்து விழும்
சொற்களின் மீது தான்
அதிக கவனம் வைத்து
விடுகிறார்கள்
எதிரே இருப்பவர்கள்

அவர்களுக்கும் இருக்கின்றன உதடுகள்

இருக்கிய உதடுகளை
அவர்கள் பிரிக்க கூடும்

முக மூடிகளை கழற்றி
வீசி எறியக்கூடும்

பதிலுக்கு காத்திருக்கின்றன
உங்கள் முக மூடிகள்

சண்டையிட்டு
பிரிந்து விடும்
முகமூடிகள் மீது
காறி உமிழ்ந்தபடியே
இருக்கின்றன
சொற்கள்

மனித உதடுகளின்றி !

           -----மஞ்சுளா 
                 மதுரை