ஆர் வத்ஸலா
வேகும் வெயில்
முட்டை அவிக்கவும்
அப்பளம் சுடவும்
அதை தாராளமாக உபயோகிக்கலாம் தோன்றுகிறது
நல்ல வேளையாக
கணவர்
மகன்
மருமகள்
மூவரும் வீட்டிலிருந்தே பணிபுரிபவர்கள்
வீட்டுக் கடனடைந்தவுடன் நான் விருப்ப ஓய்வு எடுத்தாகி விட்டது
பேரக் குழந்தைகளை “வீடியோ கேம்”உடன் ஒரு அறையில் அமுக்கி விட்டேன்
சமையல் வாயு தீர்ந்தவுடன் இன்னொன்றுக்கு பதிவு செய்துவிட்டேன்
கடன்காரன் இன்னமும் வரவில்லை
நேற்று மாலையில் நடைப்பயிற்சி
செய்கையில்
தெருக்களில் குப்பை கண்டேன் புகைப்படத்துடன் மாநகராட்சிக்கு
புகார் செய்தேன்
மெட்ரோ ரயில் திட்டம் ஊர்ந்து செல்வதைப் பற்றி
இன்று ஒரு நாளிதழுக்கு
கடிதம் எழுதினேன்.
தொலைகாட்சியில் காட்டுகிறார்கள் –
தெருக்களில் உள்ள கூட்ட நெரிசலை –
புரியவில்லை –
ஏன் தான் ஜனங்கள் இந்த
வெயிலில் இப்படி வெளியே போகிறார்களோ!
