மனோந்திரா
(நொண்டிச் சிந்து)
யாரெனக் கேட்டதற்கு – அவன்
யாதொரு பதிலையும் சொல்லவில்லை
பாரெனை என்பதுபோல் – அவன்
பாவனை செய்வதாய் நானுணர்ந்தேன்
கூரெனப் பார்வையினைத் – தீட்டி
குறுகுறு என்றுநான் பார்த்திருக்க
நீரென பூமியிலே – சரிந்து
நிற்காமல் மண்ணிலே போய்மறைந்தான்
மாயமாய்ப் போய்மறைந்த – அந்த
மனிதனை எண்ணியே நின்றிருந்தேன்
தேயமும் நடுங்கியது – சற்று
சிந்தையும் தானுடன் குழம்பியது
காய்ந்திட வில்லைபதம் – அவன்
காயமு டன்தரை மீண்டுவந்தான்
தீயதோர் சக்தியென்றே – எண்ணித்
திரும்பியே போய்விட எத்தனித்தேன்
அஞ்சிட வேண்டாமென்றே – சொல்லி
அருகினில் வந்தவன் நின்றுகொண்டான்
“துஞ்சவோர் இடமுமின்றி – நான்
துயர்சுமந் தலைகிறேன் பூமியிலே
கொஞ்சமாய்த் தூங்குதற்கு – இடம்
கொடுத்திடு எனக்கது போதும்” என்றே
கெஞ்சியே கேட்டுநின்றான் – அவன்
கேட்டதைக் கொடுத்திட ஆசைகொண்டேன்
பஞ்சணை ஒன்றுசெய்து – அதில்
படுத்துறங் கிடும்படி நானுரைத்தேன்
சஞ்சலம் அடைந்தவனாய் – சற்றுத்
தள்ளியே நின்றவன் நகைபுரிந்தான்
கொஞ்சமாய் யோசிக்கையில் – அவன்
கொள்கைகள் மெல்லவி ளங்கினவே
பஞ்சணை என்னசெய்யும்! – அதில்
படுப்பவன் மனதினில் புயலிருக்க!
மனோந்திரா
22-06-2023
