பொறுமையின் வளைகொம்பு

This entry is part 1 of 22 in the series 2 மார்ச் 2014

பொறுமைக் கொம்பின் நுனிவரையேறி

வளைத்துப் பிடித்து வைத்திருக்கிறேன்

விட்டுவிடுவேனோ என்ற

பெரும் பயத்தில் மனது

துடிக்கிறது படபடத்து

விட்டுவிட்டேனென்றால்

வளைந்த கொம்பு

முழு வீரியத்துடன் எம்பி நிமிரும்

அதன் தாக்கம் சாமன்யமாய் இருக்காது..

விடக் கூடாதென்ற வைராக்கியம்

வளைத்துப் பிடித்தபடியே இருக்கிறது

அழுத்திப் பிடித்திருப்பதால்

தசைகள் வலிக்கிறது.. ரத்தமும் கசிகிறது

கை ரத்தக் கசிவால்

ஒருவேளை விட்டுவிட நேரலாம்..

கூடாதென்ற பிடிவாதத்தில்

தொங்குகிறது மனம்

ஆனால் விடாமல் இருந்தால்

மீண்டும் மீண்டும் நான்

ரணப்பட வேண்டி வரலாம்

முடியும்வரை பிடித்திருப்பேன்

முடியாதெனும் நிலையில்

விட்டுவிட்டு எங்கேனும் போவேனொருநாள்

கைகள் துடைத்து

சேதங்கள் பற்றிய கவலையற்று..

தி ண் ணை