“ கோலமும் புள்ளியும் “

ஸ்ரீ

கிராமத்துத் தெருக்களைப்
பசுஞ்சாணி கரைத்துக் குளிப்பாட்டி
அம்மாவும் பெண்ணும்
அக்காவும் தங்கையும்
தோழியும் தோழியும்
போட்டி போட்டுப் போடும் கோலங்கள்
அஞ்சுக்கு எட்டு புள்ளி
பத்துக்குப் பதினைந்து புள்ளி
அதற்கும் மேலே
இருபத்தஞ்சு கூட போகும்
ஒன்றோடொன்று புள்ளிகளை இணைத்தும்
ஒவ்வொரு புள்ளியையும்
நடுநடுவே வைத்தும்
கோடுகள் இழுத்தும்
கொடிபோல வளைத்தும்
கோலங்கள் கிளர்ந்தெழும்
தாமரைப்பூ மலரும்
தாழம்பூ சிரிக்கும்
கிளிகள் பறக்கும்
கிருஷ்ணன் கால் தெரியும்
கலர்ப்பொடியை நிரப்பி
பார்டர்கள் போட்டு
நடுமத்தியில்
கைநிறைய பசுஞ்சாணி வைத்துப்
பூசணிப்பூச் சொருகி
“அம்மா பாரு என் கோலம்” என்பதற்குள்
அழித்துவிட்டுப் போகின்ற
அக்கிரமக்காரத் தம்பியைத்
துரத்திச் சென்று போய் அடி பின்னியவள்
புகுந்த ’ஃபிளாட்’டின் வாசல்
ஒட்டியிருக்கின்ற
ஸ்டிக்கர் கோலத்தை
வைத்தகண் வாங்காது பார்த்து
மௌனமாய் முணுமுணுக்கிறாள்
“எட்டுக்குப் பதினைந்து….”