பழித்தலும் பழித்தல் நிமித்தமும்

கோவிந்த் பகவான்

பொம்மைகளைக் கொண்டாடி மகிழும்

சிறுபிள்ளைத் தனமாய் இருக்கிறது

நாம் நம்மீது கொண்டது

அழுக்கடர்ந்து சட்டை கிழிந்தலையும்

பைத்தியத் தனமாய் இருக்கிறது

காலம் நம்மீது கொண்டது

நான் உன்னை அன்பு செய்கிறேன் 

என பகிரியிலும் உரையாடல்களிலும்

எவ்வளவு அபத்தமாய் சொல்லியிருக்கிறேன்

நீயில்லாத வாழ்வை என்னால்

கற்பனை செய்தும் பார்க்க முடியாதென

நான் சொன்னதை இப்போது நீ நினைத்திருந்தால்

ஏளனமாய் சிரிப்பாய் தானே

அதனதன் போக்கில் 

காலத்தை நாம் பழிவாங்கியது போல்

அதுவும் நம்மைப் பழி கொண்டது.

தீர்ந்தபின் வீசியெறிந்த

பனிக்கூழ் கோப்பையாய்

என்னை வீசி எறிந்தும்

உள்ளுக்குள் இன்னும் மிச்சமிருக்கிறது நிலா

உன் குளுமை.

     – கோவிந்த் பகவான்