நிழலின் இரசிகை

செ.புனிதஜோதி

அண்டைவீட்டுக்காரியின்

பால்கனியை

என் சாளரத்தின் வழியே

இறக்கிப்போட்டு விளையாடுகிறது

நிழல்

தொட்டிச்செடியில்

அசைந்தாடும் மலர்கள்

கொடிகயிற்றோடு

உறவாடும்

உடைகள்

கூண்டுகிளியென

என் வரவேற்பறையில்.

நிஜத்தை நிழற்படம் எடுத்து

ஒட்டிக்கொண்டிருக்கிறது

ஒளிப்படக்காரனாய்

அவர்கள்

என் வீட்டிற்குள்ளிருந்துதான் 

அவர்கள்

 வீட்டிற்குள் செல்கிறார்கள்

 அன்னியர்கள் வந்துசெல்வது

 அச்சமாகத்தான் இருக்கின்றன.

 என் வீட்டிலுள்ள எந்த அறையை

யார் வீட்டிற்குள் கிடத்தி

விளையாடுகிறதோ ?

 யாரிடமும் அனுமதி

 பெறாமல் 

 பொம்மையைக் கண்டவுடன்

 விளையாடும் குழந்தையாய்.

 நிழல்

நிஜத்தின்

முகத்தை

அறிமுகம் செய்துகொண்டிருக்கிறது

அவரவருக்கு அறியாமல்

 மிரட்டவோ,விரட்டவோ

 முடியாமல் ரசிகையாகி்க் கொண்டிருக்கிறேன்.

செ.புனிதஜோதி

Series Navigation

திருமதி.மீனாட்சி சுந்தரமூர்த்தி எழுதிய அயல்வெளிப் பயணங்கள் நூல் திறனாய்வுகாற்றுவெளி வைகாசி இதழ்